法國 Pilon Du Roy 黑皂膏 Hamman Black Soap濕疹適用

法國 Pilon Du Roy 嘅有機黑皂膏，一直係本店嘅皇牌產品之一。佢係一個沖涼用品，主要成分有摩洛哥堅果油 argan oil 、尤加利精油 eucalyptus essential oil 、同埋鹽。過去黑皂膏一直用喺土耳其浴，深層清潔之餘可以去死皮，但係我哋呢個黑皂膏經過改良，無傳統嘅黑皂膏咁“杰身” 同乾，所以好多有濕疹或者主婦手，用佢之後好返好多。點解？因為洗完唔乾，唔乾就唔𢯎，唔𢯎就唔損，然後就好返好多。

黑皂膏起泡好快，拎少少已經夠，捽勻沖水又得，「醃」一陣至過水都得，甚至用嚟洗面都無問題，大人小朋友都可以用。

最多人問有關黑皂膏嘅問題，我都會一一解答：

1.    黑皂膏可以洗面嗎？可以日日用嗎？佢有無使用期限？

黑皂膏其實無咩神奇，佢只係一個好普通嘅沖涼用品，佢嘅成分就係摩洛哥堅果油、尤加利精油同埋水。原則上番梘做到嘅嘢，黑皂膏都可以超額完成，所以你可以用佢嚟洗面洗手，但唔可以落妝。你可以日日用，早晚用；同番梘一樣，佢都無使用期限（不過唔該唔好囤貨，要用先買，買咗就用，OK？）

2.    小朋友可以用黑皂膏嗎？

所有沖涼用品嘅廠家都會同你講，任何沖涼用品，3歲以上就可以用；佢哋咁樣聲明，唔代表3歲以下用咗會出事，而係大家都知道，3歲以下小朋友唔會污糟得去邊，最多都係流吓汗，就算顏色筆整到手，應該都係好容易洗嘅適合小朋友用嘅顏色筆。所以，小朋友絕對可以用黑皂膏。

3.    一罐黑皂膏可以用幾耐？

呢個問題最難回答。我只可以拎自己嘅經驗分享：一個人用，每日用一次（因為我有時候會用葡萄牙香梘沖涼），一罐大概用到二十幾日。

4.    黑皂膏要用手撩出嚟，係咪好唔方便？會唔會搞到罐黑皂膏濕晒？

黑皂膏係啫喱狀，開始嘅時候要熟悉一下，隻手窩窩地，濕身，拎黑皂膏，窩住手搽上身，捽勻，有條件嘅話俾黑皂膏「醃」一陣，然後沖水。我哋啲手指係分開嘅，唔係鴨掌，所以其實唔會有好多水滴入個罐，萬一有，你鍾意可以倒返啲水出嚟，請放心，黑皂膏好杰身，唔會倒到周圍都係；就算唔倒啲水出嚟，都無事，因為黑皂膏本身成分都有水。至於用手撩係咪唔方便，我覺得視乎你對黑皂膏嘅期望值：如果你無濕疹或者其他皮膚問題，你可能以方便為考慮，但係如果你俾濕疹困擾，我相信你會盡一切努力令皮膚快啲好。

5. 點解黑皂膏可以幫到濕疹？裡面有無藥？

黑皂膏成分只有摩洛哥堅果油、尤加利精油同埋水，無任何化學嘢，沖涼之後會覺得皮膚唔乾，但係唔油膩；唔乾，就唔痕，唔痕就唔𢯎， 唔𢯎就唔損，唔損咪好返咯。以上嘅邏輯，係幾位用黑皂膏搞返好濕疹同主婦手嘅客人話我知嘅，我信，你呢？

6. 黑皂膏有無泡？

黑皂膏有正常嘅泡，但唔係泡泡浴嗰種。事實上，你要泡？落化學嘢就得。但係化學嘢無益，有濕疹嘅人就更加忌泡，所以係呢方面，黑皂膏係及格嘅。

7. 黑皂膏有無香味？

有，因為尤加利精油係有啲香味，但我覺得黑皂膏嘅香味，並唔係經典嘅尤加利，而係一種比較中性嘅香味。所以男女都可以用。事實上，好多客人嘅先生都好接受黑皂膏，覺得沖完好舒服。

8. 有無人唔用得黑皂膏？

有，所有精油用品，理論上孕婦都要慎用，所以黑皂膏嘅包裝上都用法文咁寫。

每罐250克